Исломда инсоннинг вужуди, кийими ва унга хос нарсалар поклиги билан бирга, унинг атрофдаги барча нарсалар ҳам пок бўлишига катта аҳамият берилган. Турар жой , кўча – кўй, майдонлар, ишхоналар, таълим муассасалари, масжидлар, нақлиёт воситалари, дам олиш жойлари, ҳамма-ҳаммаси пок бўлиши талаб қилинган.
Абу Молик Ашъарий розияллоҳу анҳудан ривоят қилинади. Набиий солаллоҳу алайҳи ва саллам : “Поклик – иймоннинг ярмидир”, дедилар. Исломда иймоннинг аҳамияти ва қадр қиммати қанчалик юқори эканини яхши биламиз. Ислом дини озодалик, поклик ва тозаликка қанчалар эътибор берганини билиб олса бўлади.
Омир ибн Саъддан, у отасида ривоят қилади :
“Расулуллоҳ солаллоҳу алайҳи васаллам: “Албатта, Аллоҳ –хушҳолдир, хушҳолликни суяди, озодадир - озодаликни суяди, карамлидир – карамни суяди, сахийдир – сахийликни суяди.”
“Бас, ҳовлиларингизни озода тутинглар” дедилар. Термизий ривоят қилган.
Ҳовли – жойларимиз, кўча – кўйларимиз, турар жой ва майдонларимиз, ҳамма жойларимиз озода тутишимиз лозим. Бошқалар озода жойни кўриб, бу жойни мусулмонларнинг жойи экан дейдиган бўлсин.
“Абу Хурайра розиялоху анхудан ривоят қилинади: “Набиий солаллоҳу алайҳи васаллам дедилар: “иймон етмиш нечта ёки олтмиш нечта шуъбадан иборатдир. Унинг энг афзали “Ла илаҳа иллалоҳ” дейиш энг кичиги – йўлдаги озор берадиган нарсани олиб ташлаш”.
Бухорий, Муслим, Абу Довуд, Термизий ва Насаий ривоят қилганлар.
Мусулмонларнинг озор берадиган нарсаларни йўлдан олиб ташлашини иймон шуъбаси даражасига кўтарган Ислом дини уларни яъни бизларни атроф муҳитдаги барча нарсаларни пок тутишга, бунинг барча чораларни кўришга ҳам чақирган.
Бизларни мусулмон қилиб яратган Аллоҳга беадад шукурлар бўлсин деймиз.