Инсон учун энг ширин ва энг азиз неъмат бу фарзанд неъматидир. Фарзандининг соғлом ва баркамол бўлиб улғаяётганини кўрган ота-она дунёдаги энг бахтли ота-она ҳисобланади. Аммо, Аллоҳ таоло бандаларини турли мусибат ва дардлар билан синайди. Айни ўйнаб кулиб оиласининг қувончига сабаб бўладиган жажжи вақтида оғир дардга чалиниб, умрининг энг гўзал дамларини шифохонада ўтказаётган жажжи болажонларни кўриб киши қалбида маюслик пайдо бўлади. 
Мана шундай дардга чалинган болажонларнинг ҳолидан хабар олиш ва уларнинг кўнглига оз бўлсада қувонч улашиш мақсадида жорий йилнинг 14 май куни "Вақф" хайрия жамоат фонди томонидан пойтахтимиздаги 4-сонли болалар клиник шифохонасида хайрия тадбири ўтказилди. Мазкур тадбирда шифохонанинг кардиоревматология ҳамда неврология бўлимларида даволанаётган 11 нафар болажонларга қимматбаҳо дори-дармонлар шунингдек жами 25 нафар ижтимоий кўмакка мухтож беморларга озиқ-овқат махсулотлари ҳадя қилинди.
Халқимизда болаларнинг бегонаси бўлмайди деган пурмано гап бор. Ҳурматли азиз ватандошлар, битта қилинган савоб амалга ўндан етмиштагача зиёда қилиб бериладиган Рамазон ойида, кўзларимизнинг нури бўлган болажонланларни дарддан фориғ бўлишига кўмаклашайлик!
"Вақф" хайрия жамоат фонди Матбуот хизмати
