23 ноябрь кечки соат 19-00да 97 нафар зиёратчи, 2 нафар гуруҳ раҳбари бошчилигида "Тошкент-Жидда" рейси билан учиб кетишган эди. Зиёратчиларимизни яхши кутиб олиниб, Мадина шаҳридаги 5 юлдузли "Pullman zam zam" меҳмонхонасига, Макка шаҳрида эса 4 юлдузли "Al-kiswah towers Makkah" меҳмонхонасида жойлаштирилди.
Зиёрат 10 кун яьни 23 ноябрьдан 3 декабрьгача давом этгач, Аллоҳнинг назари тушган қадамжоларда туриб, Юртимизнинг тинчлиги ва осойишталиги, фаравонлиги учун зиёратларини тўла - тўкис адо этган зиёратчиларимиз дуога қўл очдилар.
Умра зиёратини адо этиб бўлишгач, 4 декабрь санасида соат 17-30 да зиёратчиларимизнинг барчалари соғ-омон вилоятимизга етиб келдилар.
"Узоқ йиллар давомидаги орзу - умидларимиз мана бугун ўз рўёбини топди, Аллоҳ таолога чин бандаликни ижобат қилишни ният қилиб йўлга чиққан бўлсак-да, қалбимизда бироз бўлса-да ҳавотир - ҳаяжон бор эди, аммо у ерга етиб борганимизда бизни кутиб олишдаги самимият ва кўтаринкилик қалбда ғимирлаган ҳаяжонни ҳам, ҳавотирни ҳам аритди, аксинча, биз у ерда биринчи бор бўлишимизга қарамай, муҳтарам Юртбошимиз томонидан яратиб қўйилган шарт - шароитларни кўриб, кўпдан - кўп шукроналар айтдик, ўзимизни араб мамлакати тупроқларида эмас, балки ўз Ватанимизнинг ҳузурбахш - қайноқ тупроқларида юргандек ҳис этдик, бизда фақат ва фақат ибодат ва яна ибодат, Аллоҳнинг ризолигини топиш учун бор илм ва ирода - эътиқодимиз билан ҳаракат қилмоғимиз, шунча босиб ўтилган йўл, бизга берилган имкониятдан унумли фойдаланиш борасидаги ўйловларимиз бор эди, бу тупроқларга қадам қўяр экансиз, бутун вужудингизни ўзгача бир ҳис - соғинч, Росулуллоҳ соллаллоҳу алайҳи ва салламнинг кўп йиллик хижронлари қамраб олади, барча ибодатларни мутахассисларимиз кўрсатмаларига биноан бажариб бўлгач, ўз уйимизга, жонажон Ватанимизга қайтиш тараддудини кўрдик ва йўлга ҳам чиқиб олдик, Аллоҳ таолонинг гўзал байтини ҳасрати аввалгидан ҳам кучлироқ қалбларга ўрнашиб олди, биз бу у билан, бу диёр билан кўзларимизда ёш билан хайрлашдик, бу видо эмас, шунчаки бир хайрлашув онлари эди, чунки биз бу ўлкаларга, Аллоҳнинг байтига яна ва яна келишни ҳамда зиёрат қилишни ният қилдик", - дейди зиёратчи онахонларимиздан бири.
