Чин юракдан сўрагин.

Саҳроларда боғ яратган одамзот
Тиканзорда гул ўстирган одамзот
Не хохласанг етиштиргай Буюк Зот
Шукурлар қил, чин юракдан сўрагин.

Дард берибди, шифосини ҳам берар
Ғам берибди, бир кун бахтинг ҳам кулар
Қайғуларинг тиниқ сув каби тинар
Чин юракдан шифо бер деб сўрагин.

Пешонада ёзилган тақдир азал бу
Қочиб қутулмайсан чиндир ғазал бу
Даргоҳи кенг Аллоҳ берар чора бу
Чин юракдан нажот бер деб сўрагин.

Ҳаммамиз меҳмонмиз, бу дунё ёлғон
Бойлик, амал бизни ҳар куйга солғон
Ҳисоб-китоб куни келади ишон
Чин юракдан мадад бер деб сўрагин.

Кўнглингдан не ўтгани Аллоҳга аён
Шайтон изин босма охири ёмон
Тоат-ибодат қил бўш қолган замон
Чин юракдан паноҳ бер деб сўрагин.

Ҳафқориён Мфй отинойиси Шоназарова Меҳригул.