Онамнинг пойида, жаннат кошона.

Жонидан жон берган тилида асал.
Онажонлар борки, бу дунё гўзал
Она-Ватан каби муқаддас азал
Энг гўзал қўшиғим -Онам бўлади.

Метиндек ирода, буюк қалб билан
Бизни олға бошлар, зўр шитоб билан
Жуда яқин улар ой, офтоб билан
Мунис, меҳрибоним-Онам бўлади.

Юраклари хаста, жонидан ўтиб
Бош эгмас бировдан мурувват кутиб
Сабр қилиб, кўз ёшин ичига ютиб
Яшай олган, мени -Онам бўлади.

Онам дуо қилса, завол бегона
Онамнинг пойида, жаннат кошона
Қўлим кўкка чўзиб, қилдим шукрона
Ҳаққа элтар йўлим-Онам бўлади.

Оғринмай кўтарар, дунё ғамини
Боласида туйди бахтнинг таъмини
Тўлмаса майли дер, битта камини
Сабрли тоғим мени-Онам бўлади.

Навоий шаҳар Дўстлик МФЙ отинойиси Сувонова Ш.Ю.