Куни кеча Қизилтепа тумани ҳокимлиги биносида мазкур туман ҳокими Ш. Набиев тумандаги тўйхоналар эгалари ва тўйларда хизмат кўрсатувчи санъаткорлар билан учрашди.
Учрашувда Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши томонидан қабул қилинган “Тўйлар, оилавий тантаналар, маърака ва маросимлар ўтказилишини тартибга солиш тизимини янада такомиллаштириш тўғрисида”ги қўшма қарори ва шу қарорга мувофиқ тасдиқланган “Тўйлар, оилавий тантаналар, маърака ва маросимлар ўтказилишини тартибга солиш тўғрисидаги низом”да белгиланган талаблар бўйича суҳбат уюштирилди.
Туман ҳокими йиғилганларни ушбу қўшма қарор ва низом билан таништирар экан, улардаги белгиланган тартибларни алоҳида тилга олди, бу борада тўйхона эгаларининг ҳам масъулиятли вазифалари борлигини таъкидлади. Учрашув давомида туман прокурори Ф. Тожиев, туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Р. Худойбердиев, туман ҳокими ўринбосари, Хотин-қизлар қўмитаси раиси З. Рашидова, фуқароларни ўзини ўзи бошқариш органлари фаолиятини мувофиқлаштириш бўйича туман кенгаши раисининг биринчи ўринбосари Ш. Ҳабибов ҳамда Қизилтепа тумани бош имом хатиби З. Орипов ва тўйхона эгалари ҳамда санъаткорлар ҳам сўзга чиқиб, ўз фикр-мулоҳазаларини билдиришди.
