Ғозғон қишлоғида жойлашган “Шоҳимардон” масжиди XVI –асрда қурилган. Кейинчалик Бухоро амири Амир Олимхоннинг оналари ташаббуси билан қайтадан қурилган. Қурилишда маҳаллий Ғозғонлик сангтарош усталар ишлашган. Масжид деворлари тўлиқ Ғозғон мармар тошлари билан тикланган. Масжиднинг ташқи деворлари устки қисмида мармар тошларга ҳадислар ўйиб ёзилган. Масжиднинг шимоли шарқида ҳазрати Али розиёллоҳу анҳунинг рамзий қабрлари мавжуд. Масжид ҳовлисига кирмасдан чап қўлда Қамбар ота рамзий қабрлари бор. Шўролар даврида масжид фаолиятини тўхтатган. Юртимиз мустақилликка эришгач масжид яна фаолият кўрсата бошлади. Ҳозирги кунда масжид мўмин мусулмонлар ихтиёрига берилган.
