САВОЛ: Умрага борган айрим танишларим Тоифга бориб келишганини айтиб қолишди. Шу ҳолатда Маккага қайтиб киришда эҳром шарт бўладими?

ЖАВОБ: Бисмиллаҳир Роҳманир Роҳим.
Тоиф шаҳри мийқотдан ташқарида жойлашган шаҳар ҳисобланади. Тоифликлар учун мийқот Қарнул манозилдир. Шунинг учун Маккада турган инсон (хоҳ у Маккалик бўлсин ёки умра ё ҳажга борган зиёратчи бўлсин) Тоиф, Мадина ёки Риёз ва шу каби мийқотдан ташқаридаги шаҳарларга чиқса ва яна Макка ё Ҳарамга киришни қасд қилса, умра учун эҳром боғлаб кириши шарт бўлади. Агар эҳромсиз кирса, жонлиқ сўйиши вожиб бўлади. Эҳромсиз кириб қўйган киши қайтадан мийқотга чиқиб, эҳром боғлаб кирса, жонлиқ сўйиш соқит бўлади. Маккага қайтиб, Оиша разияллоҳу анҳо масжидидан эҳром боғлаш билан жонлиқ сўйишдан қутила олмайди. Чунки Оиша разияллоҳу анҳо масжиди ҳилл (мийқотнинг ичи ҳарамдан ташқари)да яшовчилар учун мийқотдир (“Бадоеъ”, “Раддул муҳтор”, “Фатово Қозихон”).

Ўзбекистон мусулмонлари идораси
Фатво маркази.