САВОЛ: Иш юзасидан Жидда шаҳрига сафар қилишимизга тўғри келди. Ишларни тугатгач умра қилишни ният қилдим. Шунда эҳромга кириш учун мийқотга бориб келаманми ёки ўша ердан эҳромга кириб ибодатга киришавераманми?

ЖАВОБ: Бисмиллаҳир Роҳманир Роҳим. Жиддага умра ёки ҳаждан бошқа ҳар қандай иш билан келинса ва асосий мақсади шу иш бўлиб, ишим битгач, умра ҳам қилиб оламан деган мақсади бўлса, бу ҳолда Жиддага эҳромсиз кириш мумкин. Ишлари битгандан кейин умра қилмоқчи бўлса, хоҳласа, Жидданинг ўзидан, хоҳласа, Танъимдаги Оиша розияллоҳу анҳонинг номларидаги масжиддан эҳромга киради. Чунки бу одам иш юзасидан Жиддага кириши билан ўша ерлик одамга айланиб қолади. Жидда мийқот билан ҳарамнинг ўртасидаги жой ҳисобланиб, бу жойлар фиқҳ китобларида “Ҳилл” деб аталади. Ҳиллда яшовчилар умра ёки ҳаж қилиш учун юқорида айтилгандек эҳромга кирадилар. Аммо асосий мақсади умра қилиш бўлиб, орада ишларини ҳам битириб кетишни мақсад қилган бўлса, бирламчи мақсади умра бўлгани учун у Жиддага кирмай туриб, мийқот ташқарисидан эҳромга кириши вожиб бўлади. Валлоҳу аълам.

Ўзбекистон мусулмонлари идораси
Фатво маркази.