Ўзбекистон мусулмонлари идорасининг 2017 йил 13 ноябрдаги 01А/113-сонли буйруғига асосан 2017-2018 ўқув йилидан бошлаб маҳаллий ҳокимият органлари билан келишилган ҳолда фуқаролар учун Қуръони карим ва тажвид ҳамда араб тили фанларини ўргатувчи 6 ойлик курслар ташкил этилади. Буйруқда кўрсатилишича, Қуръони карим ва тажвид ҳамда араб тили фанларини ўргатувчи курслар пуллик бўлиб, 6 ойга 1 500 000 (ойига 250 000) сўмни ташкил этади ҳамда Ўзбекистон мусулмонлари идораси тасарруфидаги диний таълим муассасалар қошида очилиши кўзда тутилган. Ўқув гуруҳларига тингловчилар ўқиш истагини билдирган фуқаролар аризасининг кетма-кетлиги асосида олинади ва ҳар бир гуруҳга 15 нафаргача тингловчи бириктирилиши айтиб ўтилган. Дарслар таълим муассасаларининг малакали ўқитувчилари томонидан олиб борилади.

Ўқув курслари 2017 йилнинг 1 декабридан бошланади.
Ўзбекистон мусулмонлари идорасининг мазкур ҳужжати Ўзбекистон Республикаси Конституцияси ва қонунчилигида белгиланган виждон эркинлиги билан боғлиқ ҳуқуқларни тўлақонли амалга оширишга хизмат қилади.