Xotin-qizlarning jamiyatdagi mavqeyini oshirish, ularning obro‘sini ko‘tarish davlat siyosatining muhim yo‘nalishlaridan biri sanaladi. Ma’rifatli ayol jamiyatning taraqqiyot yo‘lini belgilab beradi. Farzand tarbiyalab, uning ongi, tafakkuri, dunyoqarashi va bilim darajasini shakllantiradi. Har tomonlama barkamol avlodni voyaga yetkazish eng asosiy vazifalaridan biri hisoblanadi.
Olimalarimiz bunday jamiyatda faol boʻlar ekan, ilm-fan rivojiga hissa qoʻshibgina qolmay, undagi yangiliklar bilan tanishish, oʻzidagi iqtidor va ilmdagi yutuqlarini mamlakatimiz hamda xorijda namoyon etish imkoniga ega boʻladi.
Zahmatkash olimalarning mashaqqatli va sharafli mehnatini munosib ragʻbatlantirish, ular uchun har jihatdan qulay sharoit yaratish maqsadida Olima ayollar jamiyatiga har yili 50 milliard soʻm ajratiladi. Zamonaviy kasb-hunarlarni egallash, oʻqimishli, jamiyatda oʻz oʻrniga ega boʻlish shu tariqa umummilliy harakat darajasiga koʻtarilayotgani ayollarning baxtidir.
Mamlakatimizda xotin-qizlarni ilmiy faoliyatga keng jalb etish, ularning dasturiy ishlanmalari, innovatsion g'oyalarini qo'llab-quvvatlash masalasiga davlat siyosati darajasida e'tibor qaratilmoqda. Opa-singillarimizning ilm olishi, ularni kasb-hunarga o'qitish hamda bandligini ta'minlash, tadbirkorlikka keng jalb etish Prezidentimiz Shavkat Mirziyoev boshchiligida olib borilayotgan adolatli siyosatning ustuvor yo'nalishlariga aylandi.
Yaqin-yaqingacha jamiyatimizda “Qizlarning o'qigani shaharni olib berarmidi, qizlar o'qishni emas, turmushga chiqishni o'ylashi kerak” mazmunidagi yanglish fikrlar tez-tez uchrab turardi. Ammo bugun jamiyatimizning siyosiy-huquqiy, ijtimoiy-iqtisodiy qiyofasi o'zgarib, hayotimizda yangicha munosabatlar yuzaga kelayapti, odamlarimizda xotin-qizlarning ta'lim olishi borasida yangi qadriyatlar shakllanib borayapti.
Biz bugun Yangi O'zbekistonda Uchinchi Renessans poydevorini bunyod etish sari dadil qadam qo'ymoqdamiz. Shu o'rinda aytish joizki, yangi Uyg'onish davri, avvalo, ilm-fanning taraqqiyotiga, milliy ma'naviyatning mustahkamligiga bog'liqdir. Mazkur haqiqatni chuqur his qilgan holda xotin-qizlarning ta'limi va ilm-fan bilan shug'ullanishlari uchun davlatimiz tomonidan yangi kafolatlar va imtiyozlar paketi joriy etilgani, yangi imkoniyatlar yaratib berilayotganiga to'xtalish lozim bo'ladi.
Xususan, Prezidentimizning 2022 yildagi “Oila va xotin-qizlarni tizimli qo'llab-quvvatlashga doir ishlarni yanada jadallashtirish chora-tadbirlari to'g'risida”gi farmoni bilan 2022-2026 yillarda xotin-qizlarning mamlakat iqtisodiy, siyosiy va ijtimoiy hayotining barcha jabhalarida faolligini oshirish bo'yicha Milliy dastur hamda Milliy dasturni 2022-2023 yillarda amalga oshirishga qaratilgan kompleks chora-tadbirlar rejasi tasdiqlangandi.
Mazkur hujjatlar to'plami bilan xotin-qizlar ta'limi, ilmiy va innovatsion faoliyat bilan shug'ullanishlari uchun bir qator yangiliklar joriy etildi. Bu barchasi biz ayollarni juda mamnun etmoqda.
Ayollar ta’limiga alohida e’tibor berilayotgani tufayli oliy o‘quv yurtlariga qabul qilingan talabalarning 60 foizini xotin-qizlar tashkil etmoqda. Barcha shart-sharoitlar yaratib berilmoqda. To‘lov shartnomalari uchun foizsiz kredit mablag‘lari ajratilmoqda. Hamma mamlakatda ham bunday maxsus imkoniyatlar yaratilmayotganini koʻrib, bilib turibmiz. Shunday ekan, shukrona tuygʻusi bilan yashash va qizlarimizni oʻqitishni kun tartibidagi birinchi masala sifatida belgilasak, yurtimiz rivojiga hissa qoʻshgan boʻlamiz.
Qizlar ham bilim olishga hammadan ko‘proq intilishi lozim. Ilmli va intiluvchan qizlarimiz oʻzidagi iqtidor va ilmdagi yutuqlarini mamlakatimiz hamda xorijda namoyon etish imkoniga ega boʻlmoqda. Shuning biz o‘z ustimizda ko‘proq ishlashimiz, nafaqat o‘zimiz, bzlki kelajak avlod uchun ham mas’ul ekanligimizni unutmasligimiz kerak. Zeroki, Beshikdan to qabrgacha ilm izlash, o‘rganish joizdir